Jou ki te 23 jiyè ki sot pase a, B-atitid te pibliye yon atik pou fè remake yon seri chanjman ki te fèt nan petisyon Federasyon Pwotestan ansanm ak Shekinah te pibliye kont nouvo Kòd penal la. Men selon Pastè Lemète Zephyr, petisyon sa ki an liy depi 12 jiyè ki sot pase a viktim pirataj.

Pastè a fè deklarasyon sa pandan li t ap pale nan emisyon Panel Magik ki sou radyo Magik 9 jodi 27 jiyè a. « Se sabote yo sabote sit la. Moun ki bezwen denigre mouvman an epi divize sektè pwotestan an ki sèvi avèk zouti elektwonik pou pirate sit sa. Yo mete pwòp sa yo ta renmen ki ladan li pandan yo retire nannan petisyon an », selon sa Lemète Zephyr di egzakteman.

Li fè konnen se nan aprè midi 25 jiyè a yo rele l pou fè l konnen sa ki pase a. Pou kounya, Federasyon pwotestan ansanm ak Shekinah pral fè soti yon nòt pou eksplike piblik la sa ki pase a toujou daprè pastè a.

Li deja asire pozisyon yo ak kwayans yo kont nouvo Kòd penal la pa chanje. « Tout dokimantasyon n ap pibliye yo se bagay ki fèt avèk plizyè moun tankou avoka, tewolojyen ak lengwis ki nan plizyè komisyon nan Federasyon pwotestan an », selon sa Lemète Zephyr fè konnen.

Ou ka li tou:  Federasyon pwotestant ak Shekinah modifye petisyon yo te lanse kont nouvo Dekrè

Pastè a repete nan emisyon an, Bondye te kreye gason pou marye ansanm avèk fi pou fè fanmi. Li kwè tou gen yon seri bagay ki nan Kòd sivil ayisyen an tankou timoun dwe gen relasyon seksyèl aprè 18 lane ki dwe konsève.

Lemète Zéphyr deklare Ayiti se yon peyi lib ki gen kilti pa li ak mès pa li e ki pa dwe ap pran dikte nan men peyi letranje. « Tout moun kèlkeswa kwayans yo, kèlkeswa oryantasyon seksyèl yo dwe viv lib sou teritwa a san okenn moun pa gen dwa enpoze majorite a volonte pa li », daprè pastè Zéphyr.  

Hadson A. Albert

Kredi foto: Ted Actu